بەپەلە

رامبۆكەی نێو هێزی پێشمەرگە ژیانی لە مەترسیدایە

09:08 - 27/01/2019
هەمەڕەنگ

لە یەكێك لە نەخۆشخانەكانی شاری سلێمانیدا، ماوەی هەشت ڕۆژە قارەمانێكی شەڕی دژ بە داعش كەوتووەو وەك پێویست ئاوڕی لێنادرێتەوە.

حەمە رامبۆ، كەم كەس هەیە ناوی نەبیستبێت، ئەو پێشمەرگەیەی كە چەندین چیرۆكی نەبەردی لەسەنگەرەكانی پێشمەرگە نوسیەوە، بەڵام ماوەی چوار ساڵە بەهۆی بوونی پارچە لە بڕ بڕەی پشتیدا توانای جوڵەی كەمبووەتەوەو بەمدواییانەش توانای رۆیشتنی نەماوە، داوا دەكات فەرماندەكانی پێشمەرگە بێنە سەرخەت و لەم دۆخە ناهەموارە رزگاری بكەن.

كەم كەس هەیە ناوی حەمە ڕامبۆی نەبیستبێت، ئەو كەسەی كە تا دوێنێ بە ڕامبۆكەی پێشمەرگە ناسرابوو، ئێستا لە سووچی یەكێك لەنەخۆشخانەكانی شاری سلێمانیدا بە برینداری كەوتوەو مەترسی لەسەر ژیانی هەیە.

چیرۆكی پەككەوتنی حەمەو گەیشتنی بەم حاڵەی ئێستای، بۆ چوار ساڵ پێش ئێستا دەگەڕێتەوە، كاتێك لەشەڕی حلێوەدا لە هێرشێكی تیرۆریستانی داعش بەپارچەی هاوەن بریندار دەبێت، لەوكاتەوە تائێستا برینەكەی قوڵترو دۆخی تەندروستیشی خراپتر دەبێت.

حەمە ڕامبۆ ماوەیەك لەمەوپێش دەچێتە نەخۆشخانەی سۆران بە مەبەستی چارەسەر، بەڵام دۆخی تەندروستی خراپتر دەبێت، ئێستا ماوەی هەشت رۆژە لەم نەخۆشخانەی چەمڕێزان كە سەر بە دەزگای تەندروستی پێشمەرگە كەوتووەو كەس بەهانایەوە نەهاتووە.

محەمەد عەلی تەمەن 42 ساڵ، خەڵكی قەزای ڕەواندوزە، خێزاندارەو خاوەنی 10 منداڵە، ماوەی 28 ساڵە پێشمەرگەیە، بەشداری چەندین شەڕی كردووەو بەدرێژایی شەڕی دژ بە داعش، ئەم پیاوە وەك قەناس بەدەستێكی پێشمەرگە جەنگاوەو بەرگری لەخاكی كوردستان كردووە. لەلایەن چەند بەرپرسێكی باڵای هەرێمەوە خەڵاتكراوە‌و هێزەكانی هاوپەیمانانیش ستایشی ئازایەتیەكەیان كردوە.

بەگوێرەی ئامارەكانی وەزارەتی پێشمەرگە بڵاویكردوونەتەوە، لە شەڕی سێ ساڵەی نێوان هێزی پێشمەرگەی كوردستان و چەكدارانی داعش، هەزارو 700 پێشمەرگە شەهید بوون62 پێشمەرگەش بێسەروشوێنن، 10 هەزار پێشمەرگەی تریش برینداربوون، كە یەكێكیان ئەم پاڵەوانەی جەنگە‌و ژیانی لەبەردەم چارەنوسێكی نادیاردایە.

24628 جار خوێندراوەتەوە