سلێمانی؛ دوو هاوسەر شێوازێكی نوێ لە كاركردن تاقیدەكەنەوە

08:22 - 12/01/2019
هەمەڕەنگ

دوو هاوسەری گەنج لە سلێمانی، شێوازێكی نوێ لە كارو كەسابەت تاقیدەكەنەوەو لەڕێگەی پاسێكی مۆدێل كۆنەوە جلوبەرگی ماركە دەفرۆشن و رۆژانە لەكاتژمێر 2ی پاشنیوەڕۆوە دەرگای پاسەكەیان دەكەنەوەو تا درەنگانێكی شەو پێشوازی لەكڕیارەكانیان دەكەن و جلوبەرگ دەفرۆشن.


چیا و لەرێ ، دوو هاوسەری گەنجی سلێمانین ، لەڕێگەی پاسەوە دەیانەوێت ببنە خاوەنی كارو داهاتی خۆیان و درێژە بەژیانی هاوسەرێتییان بدەن.

بیرۆكەی دەستپێكردنی ئەم كارە جیاوازەی چیاو لەرێ بۆ ئەو قەیرانە داراییە دەگەڕێتەوە كە تەنگی بە هەموتاكێك هەڵچنیوە، نەبوونی هەلی كار، دانەمەزراندن، كەمكردنەوەی كرێی كاركردن، هەموو ئەمانە پاڵنەری ئەم دوو هاوسەرە بووە بۆ ئەم كارە.

ئەم دوو هاوسەرە پاسەكەیان لە تەنیشت ژووری بازرگانی سلێمانی ڕاگرتووەو بەهەمان ئەو ماركەیەی كە جلوبەرگەكەی لەدەرەوە بۆ دەهێنن ناویان ناوە، وەك خۆیان دەڵێن، سەرەڕای هاندان و سوپاسكردنیان، پێشوازی باشیشیان لێ دەكرێت.

چیای هاوسەری لەرێ باس لەچۆنیەتی هێنانی ئەم پاسە كۆنە دەكات و دەڵێت: لە یەكێك لەشارەكانی هەرێمەوە پاسەكەیان دەستكەووتووەو نزیكەی سێ مانگ بە نۆژەنكردنەوەو هێنانییەوە سەرقاڵبوون كە بڕی 10 هەزار دۆلاریان تێدا خەرج كردووە.

بۆ ئەم دوو هاوسەرە گەنجە، هێشتا ئاسۆی ژیان تروسكایی تێدا ماوە، بەم كارەیان، دەیان دەلاقەیان لەسەر بواری كارەیان كردووەتەوە، چیرۆكی ئەمان كۆڵنەدان و بەردەوامییە، نایانەوێت قەیرانەكان، زەفەر بە چیرۆكی خۆشەویستیان بەرێت

17931 جار خوێندراوەتەوە