هەرێمی كوردستان؛ ساڵی ڕابردوو پێنج كرێكاری بیانی كوژراون

07:36 - 11/01/2019
کوردستان


هەرێم؛ لە 2018دا 200 كەیسی جۆراوجۆر لەنێو كرێكارانی بیانیدا تۆماركراوە
ڕێكخراوێكی مەدەنی: كرێكارانی بیانی بەشێوەی نایاسایی دەهێنرێن


ڕێكخراوێكی داكۆكیكار لەمافی كرێكارانی بیانی لە سلێمانی ڕایدەگەیەنێت: شێوازو مامەڵە لەگەڵ كرێكارانی بیانی لە هەرێمی كوردستان چووەتە قاڵبی بازرگانیكردن بەمرۆڤ و جۆرێكی تری كۆیلایەتییە لەبەرگی مۆدێرندا، بەپێی ئامارێكی ڕێكخراوەكە، ساڵی ڕابردوو پێنج كرێكار كوژراون، لەگەڵ مردنی 16 كرێكاری تر و تۆماركردنی 200 كەیسی جۆراو جۆر، لەنێویشیاندا دەستدرێژی سێكسی بۆ سەر كرێكارە ئافرەتەكان.

رێكخراوی داكۆكیكار لەمافی كرێكارانی بیانی رایدەگەیەنێت: لە كوردستان هیچ یاسایەك نییە كارو مامەڵەی كرێكارانی بیانی ڕێكبخات، بەوهۆیەشەوە ڕۆژانە رووبەڕووی پێشێلكاری ئاشكرا دەبنەوە.

لە كۆنگرەیەكی رۆژنامەوانیدا رێكخراوی رۆشنبیری و داكۆكی لە مافی كرێكارانی بیانی دیارترین كێشەكانی كرێكارانی بیانی لە هەرێمی كوردستاندا خستەڕوو كە دیارترینیان، لێسەندنی پارەیە لەلایەن چەند گروپێكەوە بەناوی دروستكرنی كارتی نشینگەو لێدان و دەستدرێژی سێكسی و لێسەندنی پاسپۆرتەكانیان.

ئەو كرێكارانەی لە هەرێمی كوردستاندا كاردەكەن، زۆربەیان خەڵكی ئیدۆنیزیاو نیپاڵ و فلیپینن, بەوتە ئەندامێكی رێكخراوەكە، بازرگانی بەو كرێكارانەوە دەكرێت و وەك كۆیلە مامەڵەیان لەگەڵدا دەكرێت, هەروەها یاسای تایبەتمەندیش بە شێوازی هێنانیان و پاراستنی مافەكانیان نییە.

 بەپێی ئەو ئامارەی كە رێكخراوەكە بڵاویكردەوە، ساڵی ڕبرادوو 200 كەیسی جۆراو جۆریان لە ئەشكەنجە، دەستدرێژی سێكسی، كاركردنی زۆرو شیاو نەبوونی شوێنی مانەوەو مامەڵەی رۆژانە لەنێو كرێكاراندا تۆماركردووە كە لە 27 وڵاتی جۆراوجۆرەوە دەهێنرێنە هەرێمەوە، هەروەها پێنج كرێكاریش كوژراون، لەگەڵ مردنی 16 كرێكاریتر.

بەوپێیەی تائێستا هیچ یاسایەك بۆ پاراستنی ماف و ئەركی كرێكاری بیانی لەكوردستاندا نییە، هیچ لایەنێك لەڕوانگەی یاساییەوە خۆی بە بەرپرس نازانێ و كێشەكانیش بە ڕێگەی لابەلاوە كۆتایی پێدەهێنرێن، بە پێی ئامارە نافەرمییەكانیش، زیاتر لە 23 هەزار كرێكاری بیانی لە هەرێمی كوردستاندا هەن كە لەرێگەی بازرگان و كۆمپانیاكانەوە لە وڵاتانی دەوروبەرەوە بەشێوەی دەستی دوو هێنراونەتە ناوەوە, لە هەمانكاتدا نزیكەی چوار هەزار كرێكاری بیانیش بە شێوەی نایاسایی هاتونەتە هەرێم.

331 جار خوێندراوەتەوە