باكوری كوردستان؛ لە پێنج شار بەفر رێگای 346 گەڕەك و گوند دادەخات

04:41 - 11/01/2019
کوردستان

باكوری كوردستان؛ رێگەی سەرەكی 346 گوند گیراوە

بەهۆی ئەو شەپۆلی بەفر بارینەی باكوری كوردستانی گرتووەتەوە، هاتوچۆی رێگەی سەرەكی 346 گوند لە ئەرزڕووم، ئەرزنجان، دێرسم، ئاگری و قەرس گیراوەو لە بەدلیسیش نزیكەی دوو مەتر بەفر باریوە، بەو هۆیەشەوە خانووە یەك نهۆمییەكان و ئۆتۆمبێلەكان لەناوەندی شارەكە، بەفر دایپۆشیوون.


بەفر بارین كە ماوەی چوار رۆژە بەردەوامە، كاریگەریی نەرێنیی كردووەتە سەر ژیانی رۆژانەی خەڵكی بەدلیس، ئاستی بەفر لە ناوەندی شارەكە مەترو نیوێكی تێپەڕاندووەو خانووە یەك نهۆمییەكانی داپۆشیووە.

دانیشتوانی شارەكە ئەو بەفرەی لەسەر خانووەكان و لە دەوروبەری ماڵەكانیان كۆبووەتەوە، بە خاكەناس پاكدەكەنەوە، هاوكات بەفر ئۆتۆمبێلەكانی لە ژمارەیەك لە گەڕەكەكانی ناوەندی شارەكە داپۆشیووە، تیمەكانی شارەوانیش دەستیان بە راماڵینی بەفری كۆڵان و شەقامەكان كردووە.

هەر بەهۆی بارینی بەفرێكی زۆرەوە، رێگەی سەرەكی 346 گەڕەك و گوند لە پێنج شاری جیاواز گیراوە.

لە ئەرزڕووم كەشوهەوای سارد بە خراپی كاری كردۆتە سەر ژیانی خەڵك، بەو هۆیەوە رێگەی 174 گەرەك گیراوەو لەسەر سەربانی بیناكان چلورە دروست بوون و زۆرێك لە ئاوی حەوز و فوارەكان بەستوونی.

 بەپێی راگەیەندراوێكی ئیدارەی خۆجێیی ئەرزنجان، بەهۆی بەفربارینەوە 81 گوند، رێگای هاتوچۆیان گیراوە، لە دیرسیمیش كەشوهەوای ساردو بەفر بۆتە هۆی رێگرتنی 79 گوند.

لە راگەیەندراوێكی ئیدارەی خۆجێیی پارێزگای ئاگریش، ئاماژە بەوە كراوە كە رێگەی سەرەكی 10 گوند داخراوەو هەوڵەكان بۆ كردنەوەی رێگاكان بەردەوامی هەیە، لە پارێزگای قەرسیش بەهۆی بەفرەوە رێگای سەرەكی ناوەندی پارێزگاكەو شارۆچكەی ساركامش گیراوەو هەوڵەكان بۆ كردنەوەی بەردەوامی هەیە.

429 جار خوێندراوەتەوە