سلێمانی؛ چیرۆكی نەهامەتی خێزانێكی هەژار

04:30 - 11/01/2019
کوردستان

سلێمانی؛ باوكێك ‌و 3 منداڵ لە كەلاوەیەكدا دەژین
خانوو بۆ موبارەك ‌و مناڵەكانی دروستدەكرێت


لە گەڕەكی تاسڵوجەی سلێمانی، خێزانێكی هەژار لە خانویەكدا دەژین كە زیاتر وەك كەلاوە وایە‌و پێداویستیە سەرەكیەكانی ژیانی تێدا نیە‌و باوكی منداڵەكانیش پێشتر بە گرێبەست لە شارەوانی كاری كردوە‌و ئێستا بێ‌ كارە‌و خەڵك هاوكاری دەكەن، سەرۆكی فراكسیۆنی گۆڕان بڕیاریدا پارە بۆ دروستكردنی خانووی ئەم ماڵە هەژارە دابین بكات.

KNN سەردانی خێزانێکی هەژار دەکات لە گەڕەكی تاسڵوجە لە سلێمانی، کە پێکهاتوە لە باوكێك ‌و 3 مناڵ و لە خانوویەكی شێوە كەلاوەدا دەژین.

دیمەنی خانوەكە زیاتر لە داروپەردوی پاشماوەی جەنگ دەچێت، زبڵ‌ و خاشاك ‌و دیواری رووخاو ‌و كەلوپەلی نا پێویست لە ناو تەواوی حەوشەكەدا بڵاوبونەتەوە. لە ناوەوەشدا بە دەگمەن شوێنێك دەستدەكەوێت بۆ پشوودان ‌و دانیشتن.

دڵۆپەی باران جۆگەلەی دروستكردوە، ژێر منداڵەكان تەڕبووە، بۆ خۆپاراستن لەسەرما هەر شتێكیان لە بەتانی ‌و دۆشەك دەستكەوتبوو لە خۆیان ئاڵاندبووە.

موبارەك ئیبراهیم، هیچ سەرچاوەیەكی بژێوی نیە، پێشتر لە شارەوانی تاسڵوجە بەگرێبەست كاری كردوە‌و گرێبەستەكەی هەڵوەشاوەتەوە‌و ئەوەش هەژاری ‌و نەداری لەگەڵ خۆی هێناوە، جگە لەوەش رۆیشتنی دایكی منداڵەكان، بەتەواوەتی ژیانی ئاسایی لەناو ماڵەكە نەهێشتووە.

موبارەك ئیبراهیم لەلێدوانێکیدا بۆ KNN دەڵێت " كاتێك كابانی ماڵ لە ماڵ نەبێت ‌و هەژاریش تەنگی پێهەڵچنیی بن ‌و كچی گەورەی ماڵ 9 ساڵان بێت، ئاخۆ چۆن ژەمێك خواردن لەم ماڵەدا ئامادەبكرێت" .

موبارەك لەتاو مناڵەكانی خۆی بیرچووەتەوە، دەڵێت واز لەخۆم بهێنن بەس ژیانی منداڵەكانم ڕزگار بكەن.
 
كۆتایهاتنی چیرۆكی نەهامەتی موبارەك‌و مناڵەكانی لەسەر گەیاندنی ئەو هاوكاری ‌و دەستگیرۆییە وەستاوە، كە هەندێك لە هاوڵاتیان بەڵێنیانداوە بیگەیەنن ئەو ماڵە هەژارە، یەكێك لەوانەش عەلی حەمەساڵح سەرۆكی فراكسیۆنی گۆڕان لە پەرلەمانی كوردستانە، كە بڕیاریداوە پارەی ئیكرامیەكەی بداتە ئەو خێزانەو خانوەكەیان سەر لەنوێ بۆ دروست بكاتەوە.

8434 جار خوێندراوەتەوە