حاجیاوا: بەهۆی نەخۆشیەكەوە نزیكەی 100 سەر مەڕ و بزن مردار بونەتەوە

08:19 - 10/01/2019
کوردستان

بەهۆی بڵاوبونەوەی جۆرە نەخۆشیەكەوە نزیكەی 100 سەر ئاژەڵی ئاژەڵدارانی سنوری قەزای ڕانیە مردار دەبنەوە و خاوەنی ئاژەڵەكانیش دەڵێن: گەر لایەنی پەیوەندیدار هاوكارییان نەكات و چارەسەر بۆ نەخۆشی ئاژەڵەكانیان نەدۆزێتەوە ئەوا بەشێوەیەكی بەربڵاو ئەو نەخۆشیە زیانی گەورەیان پێدەگەیەنێت.

پزیشكێكی ڤێتێرنەریش دەڵێت: نەخۆشیەكە ( بیبزسیۆسس )ە كە لەناو خەڵكدا بەزەردوی ناسراوە، نەخۆشییەكی دەگمەن نییە و مەترسی بڵاوبونەوەی نییە، بەڵام بەهیچ  شێوەیەك گۆشتی ئەو مەڕ و بزنانە ناخورێت كە توشی ئەو نەخۆشییە بون.

لە گوندەكانی سنوری قەزای رانیە نەخۆشی (بیبزسیۆسس) لەناو مەرو بزنەكاندا بڵاو بۆتەوەو بەدەیان سەر مڕداربونەتەوە.

ئێرە گوندی گەرمكەداڵە لە ناحیەی حاجیاوا، چوارماڵ سەرقاڵی بەخێوكردنی مەڕوبزنن، سیان لەو مێگەلە مەڕانە توشی ئەو نەخۆشیە بوون‌و نزیكەی هەشتا سەر مەڕوبزنیان تا ئێستا مرداربونەتەوە.

ئەم خاوەن ئاژەڵە دەڵیت: "كاتێك مەڕوبزنەكان میز دەكەن خوێنی زۆری لەگەڵدایەو خواردن ناخۆن‌و گۆشت و چاوەكانیان زەرد دەبێت ‌و دواتر مرداردەبنەوە، ئەگەر چارەسەری بۆ نەدۆزرێتەوە ئەوا رەنگە ئەوانی تریش مردارببنەوە".

پزیشكێكی ڤێتێرنەری  دەڵێت: "نەخۆشی (بیبزسیۆسس ) كە لەناو خەڵكدا بەزەردوی ناسراوە، پاراسایتێكە یاخوود مشەخۆرێكە لەناوخوێندا دەژی‌و نەخۆشییەكی دەگمەن نییەو مەترسی بڵاوبونەوەی نییە، بەڵام بەهیچ  شێوەیەك گۆشتی ئەو مەڕوبزنانە ناخورێت كە توشی ئەو نەخۆشییە بوون‌و لەوبارەیەوە  ڕێنمایی شێوازی چارەسەر بەمەڕدارەكان دراوە.

ئاژەڵداران بۆ دۆزینەوی چارەسەر پەنایان بۆ شێوازی زانستی و هەڕەمەكی بردووە، بەڵام مرداربونەوەی مەڕەكانیان بەردەوامە... ئەم شوانە  بەفیشەك تەقاندن دوای مەڕەكان كەوتووە تا بترسن و نەخۆشیەكەیان نەمێنێت لێرەش پزیشكی ڤێتێرنەری چارەسەردەدات،  وەك ئاژەڵدارەكان دەڵێن " لەم وەرزەدا زیانەكانیان زیاترە چونكە كاتی زاوزێیەو ئەوانەی مرداردەبنەوە بێچویان لەسكدایە وتا ئێستا  زیانی  36 ملیۆن دیناریان بەركەوتووە هەرچەندە بای 2 ملیۆن دینار دەرمان و چارەسەریان كڕیوە.

تەنها ئەم نەخۆشیە زیانی لەو مەردارانە نەداوە بەڵكو ماوەیەك لەمە‌وبەر رەوە گورگ 75 سەر مەڕوبزنی خنكاندون.

1468 جار خوێندراوەتەوە