وان؛ تیمێكی شاخەوانی خۆراك بە باڵندە و ئاژەڵە كێوییەكان دەگەیەنێت

05:55 - 08/01/2019
هەمەڕەنگ

 لە بەشێك ناوچەكانی باكوری كوردستان نزیكەی پێنج مەتر بەفر باریوە بەوهۆیەوە باڵندەو ئاژەڵە كێویەكان ناتوانن خۆراك بەدەستبخەن.

گروپێكی شاخەوانی وان بۆ گەیاندنی خۆراك و ئالیك بۆ باڵندەو ئاژەڵە كێویەكان سەدان مەتر دەبڕن و لەسەر لوتكەی شاخەكان خۆراكەكە بەجێدەهێڵن.

بەفر تەنها سەرماو سۆڵەی لەگەڵ خۆیدا نەهێناوە, باڵندە و ئاژەڵە كێویەكانیشی برسی و بێ خۆراك كردوە.

 ئێستا لە زۆربەی ناوچەكانی باكوری كوردستان بەفرێكی زۆر باریوە و باڵندە و ئاژەڵە كێویەكان هیچ خۆراكێكی سروشتیان دەستناكەوێ, تیمێكی شاخەوانی وان بۆ پاراستنیان قۆڵی هیمەتیان لێ هەڵماڵیوە.

گرووپە شاخەوانیەكە لە  24 كەسی پارێزگای وان پێكهاتون و  بەسەر چیای چۆماكلی بابادا سەركەوتن كە دوو هەزار و 200 مەتر لە ئاستی رووی دەریاوە بەرزە،  ئەو خۆراك و ئالیكەی لەگەڵ خۆیان بردبوویان لە چەند خاڵێكی دیاریكراودا بۆ باڵندەو ئاژەڵە كێویەكانیان بەجێهێشت.

عومەر دەمەز سەرۆكی گروپە شاخاوانیەكە, باس لەوەدەكات, دوای سەركەوتن بەسەر چیاكەدا سەختی زۆریان بڕیوە بەڵام بە دانانی خۆراك  لەسەر بەفرەكە ماندوێتیان حەساوەتەوە.

 ئاماژەی بەوەشكردوە, بەدرێژایی وەرزی زستان لە كۆكردنەوەی ئالیك و بە جێهێشتنی  بۆ ئاژەڵە كێوییەكان بەردەوام دەبن.

ساڵانە لە كاتی بەفر باریندا  بەشێك لە ناوچەكانی باكوری كوردستان نزیكەی پێنج مەتر بەفری لێدەبارێت بە تایبەت ناوچە شاخاویەكان,  بەوهۆیەوە خۆراك و دانەوێڵە بۆ ئاژەڵ و باڵندەكان ئەستەم دەبێت، خەڵكێك بۆ پارستنی باڵندەو ئاژەڵە كێویەكان ئامادەیە خۆراك بگەیەنێتە سەر لوتكەی چیاكانیش ئەوەش وەك نیشانەیەك لە ژینگە دۆستی و رێزگرتن لە ژیان.

220 جار خوێندراوەتەوە