بەرشەلۆنە بڕیاریدا ئەم هێرشبەرە بفرۆشێت

11:42 - 08/01/2019
وەرزش

یانەی بەرشەلۆنە بڕیاریدا لەم زستانەدا دەستبەرداری مونیر حەدادی هێرشبەری ببێت بۆ ئەوەی لەكاتی  گواستنەوەی هاوینەدا بە خۆڕایی لەدەستی نەدات.

رۆژنامەی سپۆرتی كەتەلۆنی بڵاویكردۆتەوە، ئارنیسۆت ڤالڤێردیی راهێنەری یانەی بەرشەلۆنە ئیدارەی یانەكەی ئاگاداركردۆتەوە كە مونیر حەدادی لە پلانەكانی ئەم وەرزەیدا نابێت‌و بەشداری یارییەكانی قۆناغی دووەمی لالیگای پێناكات.

سپۆرت ئەوەشی ئاشكراكردوە، ڤالڤێردی داوای لە یانەكەی كردوە رێكارە كارگێڕییەكانی گرێبەستی مونیر حەدادی بگرنە بەر بۆ ئەوەی مافی ئەوەی هەبێت گفتوگۆ لەگەڵ یانەیەكیدا تردا بكات.

بەپێی هەواڵەكەی سپۆرت، یانەی بەرشەلۆنە بە داواكەی ڤالڤێری رازی بوە‌و نیازی هەیە لەم زستانەدا گرێبەستی ئەو یاریزانە هەڵبوەشێنێتەوە‌و بەیانەیەكی تری بفرۆشێت، بۆ ئەوەی لە هاوینی داهاتوو بەخۆڕایی لەدەستی نەدات، چونكە گرێبەستەكەی لەمانگی شەشی ئەمساڵ كۆتایی پێدێت.

میدیاكانی ئیسپانیاش بڵاویانكردۆتەوە، مونیر حەدادی لەگەڵ یانەی سیڤیلیە رێكەوتنی سەرەتایی كردوە‌و ئەگەر لەگەڵ بەرشەلۆنە نەگاتە رێكەوتنی هەڵوەشاندنەوەی گرێبەستەكەی، ئەوا چاوەڕێی كۆتایی ئەم وەرزە دەكات‌و دواتر بە گرێبەستێكی ئازاد روودەكاتە ئەو یانە ئەندەلوسیە.

592 جار خوێندراوەتەوە