ریاڵ مەدرید یەكێك لە باشترین یاریزانەكانی لەدەستدا

11:36 - 08/01/2019
وەرزش

یانەی ریاڵ مەدرید یەكێك لە باشترین یاریزانەكانی لەدەستدا‌و بەهۆی پێكانی رانیەوە بەلایەنی كەمەوە دوو هەفتە لە تواناكانی تۆنی كروس بێبەش دەبێت.

رۆژنامەی ماركای ئیسپانی بڵاویكردۆتەوە، لە یاریی رابردووی یانەی ریاڵ مەدرید بەرامبەر ریاڵ سۆسیداد، تۆنی كروسی ئەڵمانی دووچاری پێكان بوە‌و هەر بەو هۆیەشەوە سۆلاریی راهێنەر لە خولەكی 80 گۆڕانكاری پێكرد‌و دانی سیبایۆسی لە شوێنی خستە ناو یاریگا.

ماركا ئەوەشی ئاشكراكردوە، لەدوای یارییەكە كروس پشكنینی پزیشكی بۆ ئەنجامدراوە‌و دەركەوتوە كە پێكانەكەی لە ماسولكە گەورەكەی رانی چەپیدایە‌و چەند ریشاڵێكی دووچاری پچڕانبوە.

بەپێی هەواڵەكەی ماركا كە لە سەرچاوە پزیشكیەكانەوە دەستیكەوتوە،كروس بۆ چاكبونەوە لەو پێكانە پێویستی بە نەشتەرگەری نابێت، بەڵام بەلایەنی كەمەوە دەبێت دوو هەفتە پشوو بدات.

بەوەش ژمارەی یاریزانە پێكراوەكانی یانەی ریاڵ مەدرید بۆ شەش یاریزان بەرزبوەوە، كە لە پێشتریشدا هەریەكە لە كاسیمیرۆ‌و ئەسینسیۆ‌و ماریانۆ دیاز‌و ماركۆ یۆرێنتی‌و گاریس بەیڵ بە پێكانی جیاواز لە یانەی شاهانە دابڕاون‌و تا ئێستاش نەگەڕاونەتەوە.

426 جار خوێندراوەتەوە