هاندەرانی ریاڵ مەدرید سەیری یاریی یانەكەیان ناكەن

10:34 - 29/12/2018
وەرزش

ئامادەبونی هاندەران لەكاتی یارییەكانی یانەی ریاڵ مەدرید كەمیكردوەو چەند هۆكارێكیش بۆ كەمبونەوەی هاندەرانی هەیە.


سەرچاوەكانی هەواڵ بڵاویانكردۆتەوە، رێژەی ئامادەبونی هاندەران لە كاتی یارییەكانی یانەی شاهانەدا بەرێژەیەكی بەرچاو كەمیكردووە، بەجۆرێك لە یاریی رابردووی یانەكە لە خولی یانەكانی ئیسپانیادا تەنها 55 هەزار ئامادەبووە، ئەوەش لە كاتێكدایە یاریگای سانتیاگۆ بێرنابیۆ زیاتر لە 80 هەزار هاندەر لە خۆدەگرێت.


ئاماژە بەوەشكراوە، لە هەر یارییەكی یانەی ریاڵ مەدرید لە چاو وەرزی رابردوو زیاتر لە 10 هەزار هاندەر كەمیكردووە، هۆكاری ئەوەش بۆ خراپی ئاستی یانەكە لەم وەرزەدا رۆیشتنی كریستیانۆ رۆناڵدۆ بۆ یانەی یۆڤانتۆس دەگەڕێندرێتەوە، چونكە لە هیچ یارییەكی ئەم وەرزەدا ریاڵ مەدرید نەیتوانیوە تەواوی بلیتەكانی بە هاندەران بفرۆشێت.

1755 جار خوێندراوەتەوە