نهێنی پەیوەندییە تەلەفۆنیەكەی ترەمپ ‌و ئەردۆغان ئاشكرادەبێت

07:58 - 28/12/2018
جیهان

ترەمپ لە هۆشداریدان بە ئەردۆغان پەشیمانبوەتەوە
ترەمپ لە پەیوەندییە تەلەفۆنیەكەیدا لەگەڵ ئەردۆغان پابەندی ئەجێندای تیمەكەی نەبووە

نهێنی پەیوەندییە تەلەفۆنیەكەی ترەمپ ‌و ئەردۆغان ئاشكرادەبێت كە دوو هەفتە لەمەوبەر ئەنجامیاندا ‌و لەپەیوەندییەكە ترەمپ پابەندی ئەجێندای تیمەكەی نەبووە‌و بریاربووە هۆشداری بدات بە ئەردۆغان لەبارەی هێرشكردنە سەر هێزە كوردییەكان، لە جیاتی ئەوە بە ئەردۆغانی وت كە لە سوریا دەكشێنەوە.

ئاژانسی هەواڵی رۆیتەرز لە زاری پێنج سەرچاوەی ئاگادار لە ناوەڕۆكی پەیوەندییە تەلەفۆنیەكەی ترەمپ و ئەردۆغانەوە بڵاویكردووەتەوە، كە بەر لە ئەنجامدانی پەیوەندییە تەلەفۆنیەكە، بڕیاربووە ترەمپ هۆشداری بداتە ئەردۆغان لەبارەی پلانەكانی بۆ هێرشكردنەسەر ئەو هێزە كوردیانەی لە سوریا كە واشنتۆن پاڵپشتیان دەكات.

بەڵام، لە كاتی پەیوەندییەكەدا و پاش دەستپێكردنی گفتوگۆ، لەجیاتی ئەوەی هۆشداری بداتە ئەردۆغان، ترەمپ لە ئەردۆغانی پرسیوە، كە ئەگەر ئەمریكا هێزەكانی لە سوریا بكشێنێتەوە، ئایا توركیا دەتوانێت سوریا لە داعش پاكبكاتەوە؟. دوای ئەوەی ئەردۆغان بە ئەرێنی وەڵامی ترەمپی داوەتەوە، ناوبراو دەستبەجێ بە ئەردۆغانی وتووە " كەواتە ئێوە ئەنجامی بدەن". پاشان راستەوخۆ داوای لە جۆن بۆڵتنی راوێژكاری ئاسایشی نیشتمانی كردووە، كە ئامادەكاری بۆ كشانەوەی هێزەكانیان لە سوریا بكەن.

تایبەت بە هەمان پرس، ترەمپ لە سەردانە چاوەڕواننەكراوەكەیدا بۆ عێراق، كە ئامانج لێی بەسەركردنەوەی هێزەكانی وڵاتەكەی بوو لە بنكەی ئاسمانیی ئەسەد وتارێكی پێشكەشكرد و گفتوگۆكردنی كشانەوەی هێزەكانی لەگەڵ ئەردۆغان پشتڕاستكردەوە.

دۆنالد ترەمپ، سەرۆكی ئەمریكا دەڵێت: 
" ئێمە بە خراپی تێكمان شكاندن. پێتاندەڵێم كە گفتوگۆیەكی زۆر باشم لەگەڵ سەرۆك ئەردۆغان ئەنجامدا كە ئەویش دەیەوێت تێكیان بشكێنێت، هەربۆیە ئەو ئەنجامی دەدات".

ئەم بڕیارەی ترەمپ بەرپرسانی توركیا و هەروەها ئەمریكاشی تووشی شۆك كرد, بە جۆرێك كە بەرپرسانی باڵای ئیدارەكەی، لە نێویشیاندا جیم ماتیس، وەزیری بەرگری بۆ ماوەی چەند رۆژێك هەوڵی پاشگەزكردنەوەی ترەمپیان لە بڕیارەكەی-دا. بەڵام دوای ئەوەی كە شكستیانهێنا لە قایلكردنی و پاش ئەوەی ترەمپ بڕیاری كشانەوەی هێزەكانی وڵاتەكەی لە سوریا لە رێگەی تویتەرەوە ئاشكراكرد.

هەریەك لە جیم ماتیس وەزیری بەرگری و برێت مەكگۆرك، نێردراوی تایبەتی ئەمریكا بۆ شەڕی دژ بە داعش لە هاوپەیمانی نێودەوڵەتی دەستیان لە كاركێشایەوە.

12612 جار خوێندراوەتەوە