سلێمانی؛ KNN لەزاری مامیەوە دواهەمین قسەی سێوە ئاشكرا دەكات

08:23 - 24/12/2018
کوردستان

دوای 8 رۆژ مانەوە لە نەخۆشخانە دایكی منداڵە سوتاوەكانی چەمچەماڵ گیانی لەدەستدا
KNN زانیاری نوێ لەسەر سوتانی سێوە‌و منداڵەكانی ئاشكرا دەكات


لە مەراسیمی ناشتنی سێوە قادر دایكی ئەو سێ منداڵەی دوای هەشت رۆژ مانەوەی لەنەخۆشخانەی ژیانی لەدەستدا، قایمقامی چەمچەماڵ رایگەیاند: سەرجەم بەڵگەكانی ئەو رووداوە ئاراستەی داواكاری گشتی كراوەو كاری یاسای لەسەر دەكرێت، مامیشی دواهەمین قسەی برازاكەی ئاشكرا دەكات كە بەچەند چركەیەك بەر لەمردنی داوای چی لەكەسوكارەكەی كردووە، باوكیشی سەرەڕای خەمی لەدەستدانی كچەكەی و منداڵەكانی، خەمی ئەوەیە دۆسیەكە رووداوی نەخوازراوی تری لێنەكەوێتەوە و رەوتی یاسایی و ئاسایی خۆی وەربگرێت.

سێوە قادر، دایكی سێ‌ منداڵەكەی چەمچەماڵ دوای هەشت رۆژمانەوە لە نەخۆشخانە، سەرلەبەیانی رۆژی دووشەممە بەیەكجاری ماڵئاواییكرد. 

ئەمە دوا قسەی بەر لەمردنی سێوە بوو، كە لەزاری شەفێق نوری، مامیەوە بەگەروی پڕ لەگریانەوە لەبەردەم پزیشكی دادی سلێمانی بەرلەبردنی تەرمەكەی لەوەڵامی پرسیارێكی KNN دا ئاشكرایكرد.

مام قادری جەرگ سوتاو باوكی سێوە، كە هیچ كەسێك لەبەردەم ئازاری پڕ لەسوێیدا خۆی بۆ راناگیرێت هێشتا دڵی لای ئەوەیە، كە رووداوی تر رونەدات داوا لە كەسوكاری هاوسەری كچەكەی دەكات نەیەنە پرسەكەی.

تەرمەكەی سێوە لەبەردەم پێشوازییەكی شایستەی خەڵكی چەمچەماڵدابوو.

تەرمەكەی ئەویان لە تەنیشت هەرسێ منداڵەكەیەوە بەخاكسپارد.

قائیمقامی چەمچەماڵ دەڵێت: سەرجەم بەڵگەكان ئاراستەی داواكاری گشتی كراون ‌و كاری یاسای لەسەر دەكرێت. 

قایمقام بەوەشەوە نەوەستا، بڕیاریدا ئاڵای كوردستان لە قەزاكەیان بۆ نیوە دابگیرێت ‌و پرسەی سەرتاسەریشی راگەیاند.

لە هەموو كوچەیەكی چەمچەماڵ پرسەبوو، ئیتر ئەوە مامی دەیڵێت، دوا قسەیە، كە بۆ دادگای بەجێدەهێلێت.

بەپێی زانیارییەكانی KNN كەسی سێیەم، كە نە لە كەسوكاری ماڵی سێوەیە و نە لە كەسوكاری ماڵی هاوسەرەكەیەتی بانگهێشتی دادگا كراوە، جگە لەوەش ئێستا لێكۆڵەرانی پۆلیس بەدوای وەڵامی ئەو پرسیارانەوەیە، كە كێ غازی ناوماڵەكەی كردەوە، كێ ئاوی رەئیسی ناوماڵەكەی گرتۆتەوە؟

25882 جار خوێندراوەتەوە