رەواندز؛ ئەو ژنەی لەلایەن هاوسەرەكەیەوە ئەشكەنجەدرا بۆ KNN دەدوێت

03:46 - 07/12/2018
کوردستان

رەواندز؛ تا ئێستا ئەو كەسەی تۆمەتبارە بە ئەشكەنجەدانی هاوسەرەكەی دەستگیر نەكراوە
كەسوكاری ژنەكە: ئەگەر یاسا تۆڵەمان بۆ نەكاتەوە ناچارین خۆمان مافەكانمان وەربگرینەوە


نازری خان، ئەو ژنەی خەڵكی سنوری قەزای ڕەواندزی سەر بە پارێزگای هەولێرە و پێش چەند ڕۆژێك لەلایەن هاوسەرەكەیەوە بەشێوەیەكی توند ئەشكەنجەدرا، دەڵێت: تا ئێستا نازانێت هاوسەرەكەی بۆ وای بەسەرهێناوە، خانەوادە و كەسوكاری نازری خانیش دەلێن: تۆمەتبارەكە سەربەیەكێك لە دەزگا ئەمنیەكانە و هەتائێستا دەستگیر نەكراوە دەشڵێن: ئەگەر یاسا تۆڵەیان بۆ نەكاتەوە ئەوا ناچارن خۆیان مافی خۆیان وەربگرنەوە.

نزیكەی دوو هەفتە تێپەڕدەبێت بەسەر ڕووداوی ئەو ژنەی لە لایەن هاوسەرەكەیەوە لەگوندی بەرزێوەی سەر بەقەزای ڕواندز  ئەشكەنجەدرا، بەڵام تاكو ئێستا پیاوەكە دەستگیرنەكراوە، ئەوەش كەسوكاری ژنەكەی نیگەران كردووە و پێیانوایە دامودەزگاكانی حكومەت كەمتەرخەمن لەئاست ڕووداوەكە.

نازری خان ئەو ژنەی كە لەلایەن هاوسەرەكەیەوە توندوتیژی بەرامبەر كراوە بۆ KNN دەدوێت و باس لەو كاتانە دەكات، كە هاوسەرەكەی ئەشكەنجەی داوە.

نیگەرانیەكانی كەسوكاری ژنەكە لە بەرامبەر دەستگیر نەكردنی تۆمەتبارەكە گەیشتوەتە ئاستێك، كە وەك خۆیان دەڵێن: گەر حكومەت بە ئەركی خۆی هەڵنەستێت ئەوا ناچارن خۆیان تۆڵە بكەنەوە و دەشلێن:گومانیان هەیە لە دەستگیر نەكردنی ئەو تۆمەتبارە لەبەر ئەوەی شوێن و پیشەی ئەو كەسە دیارە و سەر بە یەكێك لە هێزە ئەمنیەكانی پارتیە.

لەبارەی دەستگیر نەكردنی تۆمەتبارەكەوە وتەبێژی پۆلیسی سۆران بە كەی ئێن ئێنی راگەیاند فەرمانی دەستگیركردن بۆ هاوسەری نازری خان دەرچووە، بەڵام تاكو ئێستا شوێنی نادیارە و نەیانتوانیوە دەستگیری بكەن، هەوڵەكانیشیان بەردەوامن بۆ دەستگیكردنی و ڕادەستكردنی بەدادگا.

576 جار خوێندراوەتەوە