یەمەن؛ چاودێران هیوایان بە گفتوگۆكانی ئاشتی نییە

09:05 - 05/12/2018
جیهان

بەردەوامیی گفتوگۆكانی ئاشتیی یەمەن روون نییە

بڕیارە كۆبوونەوەی نێوان لایەنە بەشەڕهاتووەكانی یەمەن لە چەند ڕۆژی داهاتوودا بە سەرپەرشتیی نەتەوە یەكگرتووەكان لە ستۆكۆڵمی پایتەختی سوید دەستپێبكات. بەشێك لە هاوڵاتیان و چاودێرانی یەمەنیش ڕایدەگەیەنن، هیوایەكی ئەوتۆیان بە سەركەوتنی گفتوگۆكانی ئاشتیی وڵاتەكەیان نییە و ئەگەری شكستهێنانی ئەم هەوڵەی نەتەوە یەكگرتووەكان زۆرە.

ماوەی زیاتر لە سێ ساڵە شەڕی ناوخۆی یەمەن دەستیپێكردووە و بەهۆیەوە دەیان هەزار هاوڵاتیی یەمەنی كوژراون و لە ئێستادا زیاتر لە نیوەی دانیشتوانی ئەو وڵاتە توانای بەدەستهێنانی خۆراكی ڕۆژانەیان بەشێوەیەكی بەردەوام نییە.

سەرەڕای ئەوەی ئەگەری گەڕانەوەی یەمەن وەك وڵاتێكی یەكگرتوو تاكو ئێستا لاوازە، بڕیارە لایەنە بەشەڕهاتووەكانی ئەو وڵاتە لە چەند رۆژی داهاتوودا بە سەرپەرشتیی نەتەوەیەكگرتووەكان لە ستۆكۆڵمی پایتەختی سوید كۆببنەوە و یەكەم گفتوگۆی ئاشتیی نێوان حوسییەكان و حكومەتی وڵاتەكە دەستپێبكات.

بەشێك لە چاودێران پێیانوایە، سەركەوتنی گفتوگۆكانی چەند رۆژی داهاتووی یەمەن زۆر زەحمەتە و یەكەمین هۆكاریش بۆ ئەمە پابەندنەبوونی حوسیەكانە بە ئاگربەستەوە.

یەكێكی دیكە لەو هۆكارانەی ئەگەری شكستهێنانی گفتوگۆكانی سوید زیاتر دەكات بریتییە، لە نەبوونی بۆچوونێكی یەكگرتوو سەبارەت بە رێككەوتنی ئاشتی لە ناوخۆی حكومەت و تەنانەت میلیشیا حوسیەكانیش.

هاوكات بەشێك لە دانیشتوانی یەمەن هیوایەكی ئەوتۆیان بە گفتوگۆكانی ئاشتی نییە و باوەڕیان وایە، كە هاوشێوەی هەوڵە شكستخواردووەكانی رابردوو دەبێت.

دەستپێكردنی گفتوگۆی ئاشتی تایبەت بە دۆخی یەمەن چەند جارێك شكستیهێناوە، دوایین جاریش مانگی ئەیلولی ئەمساڵ بوو كە بەهۆی ئامادەنەبوونی نوێنەری حوسیەكان بۆ دانوستان، گفتوگۆكان نەكران.


سەرەڕای ڕاگەیاندنی ئاگربەست, شەڕی ناوخۆی یەمەن ماوەی چوارساڵە لە نێوان حوسیەكانی ئەو وڵاتە، كە ئێران پشتیوانییان لێدەكات لەگەڵ هاوپەیمانی عەرەبی بە سەركردایەتیی سعودیە بەردەوامە.

176 جار خوێندراوەتەوە