رۆحانی هەڕەشەی راگرتنی هەناردەی نەوتی وڵاتانی كەنداو دەكات

07:15 - 05/12/2018
جیهان

رۆحانی: ئەمریكا ناتوانێت هەناردەی نەوتی ئێران رابگرێت
پۆمپیۆ: چالاكییەكانی ئێران هاوڵاتیانی ئەمریكا و هاوپەیمانەكانمانی خستووەتە مەترسییەوە
پۆمپیۆ: پێویستمان بەوە نییە كە دەسەڵاتێكی نوێ ئێران بەرێوەببات


حەسەن ڕۆحانی، سەرۆك كۆماری ئێران رایگەیاند, ویلایەتە یەكگرتووەكانی ئەمریكا توانای راگرتنی هەناردەی نەوتی تارانی نییە و هەڕەشەی داخستنی گەرووی هورموزی كرد, كە لێیەوە وڵاتانی كەنداو نەوت هەناردەی بازاڕەكانی جیهان دەكەن. مایك پۆمپیۆی وەزیری دەرەوەی ئەمریكاش رایگەیاند كە واشنتۆن لە سنورداركردنی تواناكانی ئێران لە ناوچەكە بەردەوام دەبێت و چالاكییەكانی تارانی بە هەڕەشە بۆ سەر ئەمریكا و هاوپەیمانەكانی وەسفكرد.

حەسەن ڕۆحانی، سەرۆك كۆماری ئێران لەمیانی گەشتەكەی بۆ پارێزگای سمنان لە شاری شاهرۆد, هێرشی توندی كردە سەر ئەمریكا و ڕایگەیاند: ئامانجی ئەمریكا ئەوەیە ئێران لە فرۆشتنی نەوت بێبەش بكات ‌و كۆتایی بە بازرگانی تاران بهێنێت ‌و لە ناوچەكە بەتەنها بیهێڵێـتەوە.

رۆحانی ئاماژەی بەوەكرد: ئەگەر ئەمریكا بیەوێت هەناردەكردنی نەوتی ئێران رابگرێت ئەوا دەبێت بزانێت بە هیچ جۆرێك نەوت لە ناوچەی كەنداوەوە نافرۆشرێت.

گەرووی هورموز, دەكەوێتە نێوان ئێران و عومانەوە و ڕێڕەوێكی گرنگی هەناردەكردنی نەوتی وڵاتانی كەنداوە بۆ بازاڕەكانی جیهان.
رۆحانی لە درێژەی وتەكانیدا وتیشی: دەبێت ئەمریكا بزانێت كە تاران نەوتی خۆی دەفرۆشێت ‌و بەردەوام دەبێت لە هەناردەكردنی.

لە بەرامبەریشدا مایك پۆمپیۆ، وەزیری دەرەوەی ئەمریكا لە برۆكسلی پەیتەختی بەلجیكا هۆكاری كشانەوەی واشنتۆنی لە رێككەوتنە ئەتۆمییەكەی ئێران بۆ چالاكییە ئاژاوەگێڕییەكانی تاران لە رۆژهەڵاتی ناوەڕاست و ناوچەكە گەڕاندەوە و ئاماژەی بەوەكرد وڵاتەكەی نایەوێت دەسەڵاتی سیاسیی ئێران بگۆڕێت، بەڵكو ئامانجیان رێگریكردنە لەو مەترسیانەی ئێران كە بۆ سەر ئەمریكا و هاوپەیمانەكانی لە ناوچەكە دروستیان دەكات.

دۆناڵد ترەمپی سەرۆكی ئەمریكا مانگی پێنجی ئەمساڵ لە رێككەوتنە ئەتۆمییەكەی ئێران كشایەوە و تەواوی ئەو گەمارۆ ئابورییانەی بەسەر ئێراندا سەپاندەوە كە بەهۆی رێككەوتنەكەوە واشنتۆن لەسەر تارانی لابردبوو. لە سەرەتای مانگی رابردوودا دووەم قۆناغی گەمارۆكانی ئەمریكا بۆ سەر تاران خرایە بواری جێبەجێكردنەوە، كە بوارەكانی وزە و بانكی لەو وڵاتە كردە ئامانج.

395 جار خوێندراوەتەوە