قەتەر كشانەوەی لەڕێكخراوی ئۆپیك ڕاگەیاند

10:34 - 03/12/2018
ئابوری

سەعد كەعبی؛ لەسەرەتای ساڵی داهاتوەوە هیچ پەیوەندیەكمان بەئۆپیكەوە نامێنێت

حكومەتی قەتەر كشانەوەی لەڕێكخراوی ئۆپیك ڕادەگەیەنێت و وەزیری وزەی قەتەریش دەڵێت: لەسەرەتای ساڵی نوێوە هیچ پەیوەندیەكیان بەئۆپیكەوە نامێنێت. 


ئاژانسی هەواڵی ڕۆیتەرز بڵاوی كردوەتەوە، سەعد بن شریدە ئەلكەعبی وەزیری كاروباری وزەی قەتەر لە كۆنگرەیەكی ڕۆژنامەوانیدا كشانەوەی وڵاتەكەی لە ڕێكخراوی ئۆپیك ڕاگەیاندوە و ڕێكخراوەكەشیان لەو بڕیارە ئاگاداركردوەتەوە.

 وەزیری وەزەی قەتەر ئاماژەی بەوەشكردوە كشانەوەی وڵاتەكەی وا دەكات قەتەر گرنگی زیاتر بدات بە گەشەدان بەبواری بەرهەمهێنانی غازی سروشتی، بەتایبەت لەو پلانەی كە بەم دواییانە بڕیاریاندابوو ساڵانە بەرهەمهێنانی غاز لە77 ملیۆن تۆنەوە بۆ 110 ملیۆن تۆن بەرزبكەنەوە، هەروەك لەڕابردوو پلانی ستراتیژییان بۆ برەودان و فراوانكردنی كەشتیڕانیی داناوە لەدەرەوە و ناوەوەی قەتەرو دەشیانەوێت بایەخی زیاتر بەپێگەی قەتەر لەبواری بەرهەمێنانی غازی سروشتی لەسەر ئاستی جیهان بدەن.

305 جار خوێندراوەتەوە