هەولێر؛ هەڵمەتێكی پشكنین بۆ نەخۆشی ئایدز ئەنجامدەدرێت

06:44 - 02/12/2018
تەندروستی

كارمەندانی تاقیگەی تەندروستی گشتی هەولێر، بەبۆنەی ڕۆژی جیهانی ئایدزەوە, لەناو بازاڕی شارەكە چەند چالاكیەكی پزیشكی رێكدەخەن و بەبێ‌ بەرامبەر پشكنینی خوێن بۆ هاوڵاتیان و رێبوارانی ناو بازاڕەكە ئەنجام دەدەن، هاوكات رونكردنەوە و هۆشیاری لەبارەی نەخۆشیەكە و چۆنیەتی توشبون و هۆكارەكانی گواستنەوەی نەخۆشیەكە بۆ هاوڵاتیان دەخەنەڕوو.

لە چوارچێوەی چالاكیەكانی تایبەت بە رۆژی بەرەنگاربونەوەی نەخۆشی ئایدز، بەرێوبەرایەتی تەندروستی هەولێر هەڵمەتێكی پشكنینی ئایدز بۆ هاوڵاتیان ئەنجامدەدات.

تیمی گەڕۆكی تەندروستی هەولێر لەبەردەم قاوەخانەی مەچكۆ پشكنینی ئایدزیان بۆ هاولاتیان دەكردو یەكێك لە پزیشكەكان ئاماژەی بەوەدەكرد، ساڵانە ئەم پشكنینی ئایدز بێ بەرامبەربۆ هاوڵاتیان دەكەن.

ئەو هاوڵاتیانەی لەلای تیمە گەڕۆكەكانەی تەندروستی هەولێر پشكنینان ئەنجامدا داوایان دەكرد، بۆ هەموو نەخۆشیە كوشندەكان ئەو هەڵمەتە رابگەینرێ و سالانەش لە رۆژێكدا ئەو هەڵمەتە ئەنجام نەدرێ، بەڵكو مانگانە تیمی گەرۆك هەبێت و پشكنینی بێ بەرامبەر بۆ هاوڵاتیان بكات.

 

بەپێی دواین ئاماری وەزارەتی تەندروستی هەرێم لەساڵی 1986ەوە تاوەكو ئەمساڵ، 32 حاڵەتی توشبون بەنەخۆشی ئایدز لە هەرێمی كوردستان تۆمار كراون، كە 9یان ژن بون و 23تریشیان پیاو بون, ساڵانەش پشكنین بۆ زیاتر لە 350هەزار كەس ئەنجام دەدرێت.

147 جار خوێندراوەتەوە