ڕەواندز؛ پیاوێك بە نامرۆڤانەترین شێوە ئەشكەنجەی هاوسەرەكەی دەدات

11:49 - 02/12/2018
کوردستان

تا ئێستا تۆمەتبارەكە دەستگیرنەكراوە
پۆلیسی سۆران بەبیانوی كێشەی كۆمەڵایەتیەوە ئامادەنیە لەوبارەیەوە ڕونكردنەوە بدات


لە سنوری قەزای سۆران, پیاوێك بە توندرین و نامرۆڤانەترین شێوە ئەشكەنجەی هاوسەرەكەی دەدات و بەبیانوی كێشەی كۆمەڵایەتیەوە پۆلیسی سۆران ئامادەنیە هیچ ڕونكردنەوەیەك لەو بارەیەوە بدات.

شێروان خالید, وتەبیژی بەڕێوەبەرایەتی توندوتیژی دژی ژنان لە سۆران, بە KNNی ڕاگەیاند: ئەو ژنەی لەلایەن هاوسەرەكەیەوە بە شێوەیەكی زۆر نامرۆڤانە ئەشكەنجە دراوە و بەوهۆیەوە ڕەوانەی نەخۆشخانە كراوە و لە ئێستادا لەژێر چاودێری پزیشكیدایە.

وتیشی: ئەو ژنەی ئەشكەنجە دراوە دانیشتوی گوندی بەرزێوەی سەر بە قەزای ڕەواندزە و دایكی سێ‌ منداڵە.

لایخۆشیەوە فاخیر مەحمود, برا گەورەی ئەو ژنەی روبەڕوی لێدان بوەتەوە بە KNNی ڕاگەیاند: چوار ڕۆژە لەلای پۆلیس و بەرەنگاربونەوەی توندوتیژی دژی ژنان سكاڵای یاساییان تۆماركردوە بەڵام هەتا ئێستا ئەو تۆمەتبارەی ئەشكەنجەی خوشكەكەیانی داوە دەستگیرنەكراوە.

هاوكات KNN پەیوەندی كرد بە پۆلیسی قەزای سۆرانەوە, بەڵام بە بیانوی كێشەی كۆمەڵایەتیەوە ئامادەنەبوو هیچ لێدوان و زانیارییەك لەسەر ئەو ڕوداوە بدات.

25836 جار خوێندراوەتەوە