كاتی دەوامكردن لەبەغداد دەگۆڕێت و دابەشدەكرێت بۆ سێ كاتی جیاواز

09:26 - 26/11/2018
عێراق

گۆڕینی كاتی دەوام بۆكەمكردنەوەی قەرەباڵغییە لەسەر شەقامەكان
بەشێك لەفەرمانگەكان كاتژمێر 7 و ژمارەیەكیان 8 و هەندێكی تریان كاتژمێر 9 دەوام دەكەن


بەڕێوەبەرایەتی پۆلیسی هاتۆچۆی بەغداد ڕایدەگەیەنێت، بۆكەمكردنەوەی قەرەباڵغی لەسەر شەقامەكان سەرۆك وەزیرانی عێراق ڕەزامەندی نیشانداوە كاتی دەوامی دامودەزگا حكومییەكان بگۆڕێت.


بەڕێوەبەرایەتی گشتی هاتوچۆی بەغداد لەبەیاننامەیەكدا لەسەر زاری عەمید حەیدەر ڕەشید قەساب، بەڕێوەبەری بازگەكان و هەواڵدەریی ڕایگەیاندوە، عادل عەبدولمەهدی سەرۆك وەزیرانی عێراق ڕەزامەندی نیشانداوە بۆ گۆڕینی كاتی دەوامی وەزارەت و دامودەزگا حكومییەكان.

لەبەیاننامەكەدا هاتوە بەپێی پلانە نوێیەكە ژمارەیەك لەوەزارەت و زانكۆ و دامودەزگا حكومیەكان دەوامیان لەكاتژمێر حەوتی بەیانییەوە دەستپێدەكات و ژمارەیەكیان كاتژمێر هەشتی بەیانیی و ئەوانی دیكەش دەوامەكەیان كاتژمێر نۆی بەیانی دەستپێبكات. 

بەپێی پلانەكە ڕۆژانی پشوی وەزارەت و دامودەزگانیش دەگۆڕێت و ژمارەیەك لەدامودەزگاكان پشوەكانیان دەخرێتە ڕۆژانی هەینی و پێنج شەممە و ژمارەیەكی دیكەیان ڕۆژانی هەینیی و شەممەو ئەوانی تریش ڕۆژانی شەممەو یەكشەممە پشویان دەبێت.

6713 جار خوێندراوەتەوە