سلێمانی؛ بۆ یەكەمجار لەسەر ئاستی عێراق نەشتەرگەری چاندنی سەمامی دڵ ئەنجامدرا

08:53 - 24/11/2018
تەندروستی

بۆ یەكەمجار نەشتەرگەریەكی تایبەت بە چاندنی سەمامی دڵ لەسەر ئاستی عێراق و هەرێمی كوردستان لە سەنتەری نەخۆشیەكانی دڵ لەسلێمانی ئەنجامدرا. 

دكتۆر ئارام جەمال میرزا، كە سەرپەرشتی نەشتەرگەرییەكەی دەكرد، بە KNNی راگەیاند: تا ئێستا چوار كەس ئەو نەشتەرگەریەیان بۆ ئەنجامدراوە، كە بریتیە لە چاندنی سەمامی دڵ و ئەو نەشتەرگەریە بۆ ئەو كەسانە دەكرێت، كە ناتوانرێت لە رێگەی كردنەوەی سنگ نەشتەرگەرییان بۆ ئەنجام  بدرێت.

كاتژمێر 11ی بەیانییە لە ناو سەنتەری بوژانەوەی دڵ لە سلێمانی پزیشكەكان سەرقاڵی نەشتەرگەریەكی دەگمەنن.

ئەمە یەكێكە لەو نەخۆشانەی ئەم نەشتەرگەریەی بۆ دەكرێت، سەرۆكی تیمی نەشتەرگەری د ئارام جەمال میرزا، دەڵێت: دوای پێنج ساڵ هەوڵ و بەردەوامی دواجار توانییان بۆ یەكەم جار لە عێراقدا ئەو نەشتەرگەریە ئەنجامبدەن.

پسپۆڕی نەخۆشیەكانی دڵ لەگەڵ وەزیری تەندروستی و بەڕێوەبەری تەندروستی سلێمانی لە كۆنگرەیەكی رۆژنامەوانیدا سەركەوتنی پرۆسەكەیان راگەیاند.

 ئەمە چوارەمین نەخۆش  بوو ئەو نەشتەرگەریەی بۆ ئەنجامدرا، یەكێك لە تایبەتمەندیەكانی ئەو نەشتەرگەریە ئەوەیە نەخۆش بێ ئەوەی قەفەزەی سنگی بكرێتەوە بە ئامێرێكی ئەلكترۆنی لە رانی نەخۆشەكەوە لە ناو بۆری خوێن سەمامەكە رەوانە دەكرێت و دەگۆڕدرێت، دوای شەش رۆژیش نەخۆشەكە دەچێتەوە سەر پێی خۆی.

بە پێی بەدواداچونێكی KNN، بۆ یەكەم جار دە ساڵ لەمەوبەر لە وڵاتی ئەڵمانیا ئەو نەشتەرگەریە ئەنجامدراوە و تێچوی هەر نەخۆشێك 40 هەزار دۆلار بوەوه‌، بەئەنجامدانی ئەو نەشتەرگەریانە، سەنتەری نەخۆشیەكانی دڵ لەسلێمانی بڕوانامەی ئەنجامدانی ئەو جۆرە نەشتەرگەریەی پێبەخشرا.

381 جار خوێندراوەتەوە