پێشڕەو بابە شێخ

با خەباتی مەدەنی خاوەنداری بکرێت‌


دۆخی سیاسی و باروگوزەران و ژیانی خەڵکی هەرێم بە گشتی و موچەخۆران بەتایبەت تا دێت بەرەو خراپی دەچێت، خراپبونی دۆخی ئابوری خەڵک، بەشێوەیەکە ئومێدبڕاوی چاکبون و چاکسازی بون، ئەوەی بە بیری خەڵکدا بێت و بوبێت بە داواکاری، جگە لە چۆڵکردنی کورسیەکان و هەڵوەشانەی ئەم حکومەتە هیچ شتێکی تر نیە. ئەوەی گرنگە لەم کاتەدا بۆ چاککردنی دۆخەکە و دەرچون لە باری خراپ و رزگاربون لە ژێر دەستی حکومەتێکی خۆسەپێنی جوت حیزبی دەسەڵاتدار و کەمینەیەکی هاوکاریان، پێویست دەکات هەر لایەک بە ئەندازەی قورسایی خۆی ئەرک بکێشێ و دواجاریش ماف بەدەست بێنێت.

سەرەتاییترین مافەکانی تاکی کورد لە باشوری کوردستان پێشێلکراوە، بە پێکهاتە جیاوازەکانیشەوە، ئەرکەکان لەسەر شانی کێن؟ کێن ئەوانەی دەتوانن کاریگەری گەورە دروستبکەن؟

یەکەم/ بزوتنەوەی گۆڕان کە لەسەرەتاوە سەرکردایەتی بەرەیەکی کردوە هەوڵیداوە بۆ سەروەریی یاسا و گۆڕینی سیستەمی حوکمڕانی و شەفافی لە داهات و سامانی نەوت و حوکمڕانیەکی تەندروست و دیموکراسیانە و … هتد، بە هاوکاری کۆمەڵی ئیسلامی چ وەک پڕۆژە چ لە پەرلەمان و وەک هێزێکی سیاسی کاریگەر.

ئەوەی گرنگە ئەم بەرەیە فراوانبکرێت و هەم بە لایەنە سیاسیەکان و قەوارەکان هەم بە کەسایەتی و کەسانی سەربەخۆ و کەسانی ئازادیخوازی ناو حیزبەکانی بەرەی بەرامبەریش، بە ئەندازەیەک بزوتنەوەی گۆڕان هاوشێوەی کاریگەریەکەی دروستکردنی بەرەیەکی لەو شێوەیەی لە ئەستۆ دایە.

دوەم / رەوەندی کوردی بەگشتی و چالاکانی سیاسی و مەدەنی لەدەرەوە بەتایبەت لەزۆر کات و بۆنەو روداوە کارەساتبارەکانی سەر گەلی کورد،  قسەی خۆیان هەبوە و لێرەولەوێ کارو چالاکی و کاردانەوەیان نیشانداوە، ئەوەی بۆ ئێستا گرنگ و کاریگەرە و ئەرکە لەسەر تاک بەتاکی رەوەندی کوردی دورکەوتنەوەیە لە تەنها قسەکردن، بەڵکو دەست بەچالاکی بکرێت بۆ فشار خستنە سەر حکوماتی ئەوروپی و یەکێتی ئەوروپا بۆ شکانی بێدەنگیان بەرامبەر دەسەڵاتدارانی هەرێم و وەگەڕخستنی پشتیوانیەکانیان بۆ خەڵکی کوردستان، نەک حکومەتی کوردستان.

دەبێت لەو رێگەیەوە ئەوە پیشانی دیموکراسیخوازان و ئازادیخوازان و مرۆڤ دۆستانی ئەوروپی بدرێت، کە هاوکاریکردن و پشتیوانی لە کورد بریتی نیە لە پشتیوانیکردن لەم دەسەڵاتەی ئێستا، بەڵکو پشتیوانی وڵاتانی ئەوروپی بۆ کورد و خەڵکی کوردستان بریتیە لە پشتیوانی نەکردنیان لەم حکومەتەو لەم دەسەڵاتە شکستخواردوە.

سێیەم/ گرنگ و کاریگەرە مانگرتنی گشتی لەسەرانسەری کوردستان رابگەیەنرێت، چونکە بە پێداچونەوە بە رابردو تێدەگەین هەمو رێگاکانی تر تاقیکرانەوە و سەرکەوتنی ئەوتۆیان دەستنەخست. بە مانگرتنی گشتی و گەیاندنی ناڕەزایی بۆ دونیای دەرەوە ئەنجامی باش بەدەست دێنێت، بە شێوەیەک خۆپیشاندان و ناڕەزاییەتیەکان بە ئەنقەست و بە دەست پشێوی و نا ئارامی لێدەکەوێتەوە و لەدواجاریشدا تەقەکردن لە هاوڵاتی مەدەنی و کوشتن و بریندارکردنی لێدەکەوێتەوە. داواکاریەکان لە سەقفێکی بەرز لە چۆڵکردنی دەسەڵات و گۆڕانکاری و چاکسازی و داوای مافی رەوا، بەرەو بەردانی دەستگیرکراو و شیفا خواستن بۆ بریندار کۆتایی دێت .

چوارەم/ ئاین و ئاینزاو پێکهاتەی نەتەوەیی جیاواز لە کوردستاندا بونیان هەیە، بەشداری و هێنانە پێشی ئەوان بۆ ناڕەزایی و بەشداریکردنیان لە داواکاری و ناڕەزایەتیەکانی خەڵکی کوردستان بەگشتی دەنگدانەوە و رەنگدانەوەی باشی دەبێت لە دونیای دەرەوە، بەتایبەت دروستکردنی ئەوبەرە نوێیە بە بەشداری کارای ئەوان کاردانەوەی خۆی دەبێت. نزیکبونەوە بەو شێوازە وەڵامدەرەوەی زۆر شت دەبێت، بەتایبەت مەسەلەی کۆتا و مامەڵە کردنی زیاتری پارتی بەو دەنگانەو بەو پێکهاتانەو پێچەوانە بونەوەی بە سودی خۆیان و سودی ئەم دۆخەو لەدواجاریشدا بۆ هەمو کوردستان.

پێنجەم/ بەرەیەک بەو شێوازەو بەو ئاڕاستەیە کار بکات، ببێ بە بەدیلی راستەقینەی ئەم حکومەت و ئەم حیزبانەی دەسەڵات، پێش هەر هەڵبژاردنێک لەگەڵ حکومەتی عێراقی ئەوە یەکلا بکرێتەوە موچە لە بەغداو لە ژێر دەستی حکومەتەوە دابەش بکرێت، چونکە ئەوەی لە کوردستان گۆڕانکاری دروست دەکات تەنها و تەنها دەرهێنانی هێزو پارەیە لەژێر دەست و هەیمەنەی دو حیزبی باڵا دەست و خاوەن هێزی چەکدار و کۆمپانیا، ئینجا کارکردن بۆ هەڵبژاردنێکی پاک و بێگەرد.

شەشەم/ دەبێت کار بۆ ئەوە بکرێت و بیر هەمو لایەک بهێنرێتەوە لە کوردستان هەڵبژاردن بەشێک نیە لەدیموکراسی ئەوەندەی هۆکارێکە بۆ بەردەوامبون و مانەوە و خۆسەپێنی دەسەڵاتداران لە رێگای تەزویر و بەکارهێنانی هێزو پارە و دەسەڵاتیان.

دیموکراتی لێرەدا لەوەدا نیە هەڵبژاردن تەنها بۆ جوانکردن و نیشاندانی پرۆسەیەک بێت، ئەوەندەی نەهامەتیەکە لەکاتی بەڕێوەچونی پرۆسەکەو لێکەوتەکانی دواتریشی، بۆیە کارکردن بۆ ئەنجامدانی هەڵبژاردن بە شێوازو هۆکارەکانی پێشو هیچ نیە جگە لە مانەوە و بەردەوامبونی دەسەڵات بەدەستان لە برسیکردن و بەردەوامی نەهامەتی و ناشەفافی لە داهات و نایەکسانی لە بەخشینەوەی سامان و داهاتی نەتەوەیی .

دروستکردنی بەرەیەک لە هێزو لایەن و قەوارەو جوڵەو کەسایەتی دیار و سەربەخۆ و ئەکادیمی و نوسەران و رۆشنبیران و ریفۆرمخوازانی خودی دو حیزبەکەش، هەنگاوێکە کارێکی قورس و گران نیە بۆ ئەم دۆخەی کوردستان جگە لە بانگەوازێک و دانانی بەرنامە و پلانی هەنوکەیی و لەدواجاریشدا جۆرێک لە کاردابەشکردن بۆ هەر دانوستان و جوڵانەوەیەکی مەدەنی، بە ئاڕاستەیەک ئیتر لە کوردستان لەوە زیاتر دەستی دەستی بە هاوڵاتی و موچە خۆران و ئازادیخوازان نەکرێت. ئیتر کاتی هاتوە دوای هەمو ئەمانە بەرەیەک هەبێت پێشەوایەتی و خاوەنداری شەقام بکات. ئیتر کاتی ئەوە هاتوە بەرەیەک لەناو شەقام و لەسەر قوتی خەڵک هاوار بکات ئیتر رێگە نادەین خەڵک برسی بکرێت، رێگە نادەین ئاڕاستەی خۆپیشاندان بە مەرامی ناشیرین نیشاندانی داواکاری و خۆپیشاندان بگۆڕدرێت، ئیتر کاتی ئەوە هاتوە داواکاری و خۆپیشاندان خاوەنداری بکرێت، ئیتر کاتی ئەوە هاتوە خاوەندارێتیەک بکرێت لولەی چەکەکان لە خۆپیشاندەران نەکرێت، یاسا سەروەر بێت و هاونیشتمانی و نیشتمان ئاشت بکرێنەوە.

خوێندراوەتەوە369