عه‌بدولره‌زاق شه‌ریف

مه‌سه‌له‌ گه‌وره‌كه‌‌


بۆ سه‌ده‌یه‌ك ده‌چێ‌ گه‌لی كورد له‌ باشوری كوردستان به‌بێ‌ خواست و دور له‌ ئیراده‌ی خۆی، به‌ په‌یمان و رێكه‌وتنه‌ نێوده‌وڵه‌تیه‌كانی‌ دوای جه‌نگ، به‌ نیشتیمانی عه‌ره‌به‌وه‌ لكێندراوه‌و له‌ چوارچێوه‌ی سنوری نێوده‌وڵه‌تی عێراق داو، وه‌ك هاوڵاتی عێراقی ژیارو ژیانی ئه‌ژی.

به‌درێژایی ئه‌و سه‌ده‌یه‌ مه‌سه‌له‌ی كورد كێشه‌یه‌كی گه‌وره‌و سه‌ره‌كی عێراق و ده‌سه‌ڵات و حكومداریه‌ یه‌ك له‌ دوای یه‌كه‌كانی بووه‌، كێشه‌ی؛ خاك، زمان، یه‌كسانی...هتد.

له‌به‌ر ئه‌وه‌ی له‌روی سیاسی و كۆمه‌ڵایه‌تی و ئابوری، هه‌میشه‌ قوڵایی جیۆستراتیجی نه‌ته‌وه‌، روو له‌ به‌شه‌كانی تری كوردستان بووه‌، له‌روی ناوخۆو نێوده‌وڵه‌تی و ئه‌قلیمیه‌وه‌، وه‌ك یه‌ك مه‌سه‌له‌ پێناسه‌ كراوه‌. بۆیه‌ لای ئه‌وانی تریش كێشه‌كه‌ گه‌وره‌ بووه‌و وه‌ك مه‌ترسی بۆئاسایشی ده‌وڵه‌ت لێكدراوه‌ته‌وه‌، به‌درێژایی ئه‌و سه‌ده‌یه‌، پێشكه‌وتنی‌ ئابوری ئه‌و وڵاتانه‌ی داغان كردووه‌، له‌ جیاتی بیركردنه‌وه‌ش له‌چاره‌سه‌ی بنه‌ره‌تی، ئه‌گه‌رچی هه‌وڵیش درابێ‌ بۆچاره‌سه‌ر، به‌ڵام له‌ هه‌موو قۆناغه‌كاندا پڕ گرێوگۆڵتر بووه‌.

پرۆژه‌كانی به‌عێراقی بون و سه‌ربه‌خۆیی، به‌دیموكراسی بونی عێراق و مافی چاره‌ی خۆنوسین، یه‌كێتی عێراق و جیابونه‌وه‌، یه‌كه‌میان پرۆژه‌ی نه‌ته‌وه‌ی سه‌رده‌ست و ئه‌ویتریان پرۆژه‌ی خه‌باتی گه‌لی‌ كوردستان بووه‌ .

دوای روخانی حوكمی به‌عسی عێراقی و بانگه‌شه‌ی عێراقی نوێ‌، به‌ ئومێدی چاره‌سه‌ری بنه‌ره‌تی و پێكه‌وه‌یی، هه‌موان له‌ به‌غداو پێكه‌وه‌ ده‌ستورێكی ته‌وافوقیمان نوسیه‌وه‌، له‌دیباجه‌كه‌یدا جێبه‌جێكردنی بوو به‌ مه‌رجی پێكه‌وه‌یمان. زۆری نه‌خایاند بێهیوایی له‌ جێبه‌جێكردنی ئه‌و ده‌ستوره‌ بو به‌ كه‌ڵكه‌ڵه‌و ئیتر بانگه‌شه‌ی جیابونه‌وه‌و شێوازی جیابونه‌وه‌و ئابوری سه‌ربه‌خۆ و... هتد، بوو به‌ به‌رنامه‌و ئامانج.

 روانین و جیهانبینی‌ بۆ به‌رنامه‌ی‌ كارو سیستمی‌ حكومڕانی‌  ئاینده‌و چۆنیه‌تی‌ به‌ده‌وڵه‌ت بون ته‌نیا جیاوازی‌ نێوان حیزبه‌ كوردستانیه‌كان بوو، نه‌ك ئامانجی‌ سه‌ربه‌خۆی‌ كه‌ گشتی‌ و بێ خیلاف بوو.

شانزه‌ی ئۆكتۆبه‌ر، كورد ئه‌یتوانی‌ بۆ هه‌تا، هه‌تایه‌ به‌دنیای‌ بسه‌لمێنێ‌ كه‌ شه‌ڕی‌ بون و نه‌بون له‌سه‌ر مه‌سه‌له‌كه‌ی‌ ده‌كات، له‌ نه‌مانیشدا پێشده‌كه‌وێ‌ و گه‌وره‌تر ده‌بێ‌ و ده‌یباته‌وه‌. به‌لاَم به‌داخه‌وه‌ مه‌ستی‌ خه‌یاڵی‌ مانه‌وه‌و ویستی‌ خه‌وی‌ كه‌ڵه‌كه‌بونی‌ سه‌رمایه‌و هه‌ستی‌ ئیراده‌ی‌ ته‌سلیم بون، رێكه‌وتنی‌ (عێراق و توركیاو ئێران)ی‌ له‌ به‌رژه‌وه‌ندی‌ پرۆژه‌ی‌ به‌ عێراقی‌ بون ساغ كرده‌وه‌، به‌چاودێری‌ نێوده‌وڵه‌تی‌ بۆ یه‌كه‌مجار له‌ مێژوی‌ عێراقدا، له‌ سه‌ر ده‌ستی‌ پارتی‌ و یه‌كێتی‌، كورد خۆی‌ و ئابوری‌ و هێزو حكومه‌تی‌ چووه‌ خزمه‌ت ئه‌و پرۆژه‌یه‌وه‌و  به‌غدا بووه‌وه‌ به‌ ناوه‌ند و مه‌رجیش بۆ به‌ عێراقی‌ بونمان دا ئه‌نێن..

چۆن و بۆچی وامان لێهات و وایانلێكردین ئه‌مه‌ باسێكی دورو درێژه‌و مه‌به‌ستی ئه‌م ستونه‌ نیه‌... پرسیاری‌ گرنگ ئه‌وه‌یه‌؛ ئایا مه‌سه‌له‌ی كورد، گوتاری مافی چاره‌ی خۆنوسین و ده‌وڵه‌تی سه‌ربه‌خۆ ره‌وایه‌تی له‌ده‌ست داوه‌؟! به‌دڵنیاییه‌وه‌ نه‌خێر!! 

رزگار بون له‌هه‌ژمونی‌ پارتی‌ و یه‌كێتی‌، دورخستنه‌وه‌یان له‌ده‌سه‌لاَت و حكومڕانی‌، ته‌نیا رزگار بون نیه‌ له‌ گه‌نده‌ڵی و حكومڕانی نادروست و قه‌یرانه‌ نێوخۆییه‌كان به‌ڵكوو رزگاری هه‌میشه‌یی و خاڵی ده‌ستپَكردنی و پرۆژه‌ی سه‌ربه‌خۆیشه‌.

ره‌تكردنه‌وه‌ی‌ پرۆژه‌ی‌ به‌عێراقی‌ بونه‌ كه‌ پارتی‌ و یه‌كێتی‌ ته‌سلیمی‌ بون و ئه‌یانه‌وێ‌ به‌خۆیانه‌وه‌ هه‌موو سه‌روه‌ریه‌كان و ده‌سكه‌وته‌كانی‌ میلله‌ته‌كه‌مان ته‌سلیم بكه‌ن و مێژووی‌ ده‌یان ساڵه‌ی‌ خه‌باتمان بخه‌نه‌ ژێر پرسیاره‌وه‌..

خوێندراوەتەوە1490