یاسین ته‌ها

وێنەکە لەبەغدا ‌


لەئێستادا حەیدەر عەبادى سەرکردەى بکوژو ببڕى هەموو عێراقەو هەموو پاڵپشتییەکى دەرەکى هەیە لەوەى کردوویەتى و لەوەشى دەیکات، بەهیواى ئەوەى ببێتە باڵانس بۆى لەهەڵبژاردن. هاوکات لەگەڵ ئەمەشدا دۆخێکى سیاسى ئاڵۆز بەسەر بەغدادا زاڵە و دەکرێت لەم چەند سەرە قەڵەمەدا کورت بکرێتەوە: 

ـ رۆژى 12 ئایارى 2018 دیاریکراوە بۆ هەڵبژاردنى ئەنجومەنی نوێنەران، کەچى پەیتا پەیتاو رۆژ نییە هەموو سەرۆکایەتى و لایەنەکان هوشیارى نەدەن لە ئەگەرى دواخستنى پڕۆسەکە بەسەرۆک وەزیران و باڵیۆزخانەکانیشەوە، وەک ئەوەى تەدارەکى پرۆسەکە فەراهەم نەبێت یان گرفتێکى گەورە هەبێ بەتایبەت کێشەى نەگەڕانەوەى ئاوارەکانى سوننە بۆ جێگەو ڕیگەى خۆیان.

ـ بەفەرمى نزیکەى حەوت مانگى ماوە بۆ هەڵبژاردن کەچى یاساى هەڵبژاردن تائیستا یەکلایی نەبۆتەوە لەپەرلەمان، ئەمەش شپرزەیی بۆ شێوازى پێکهێنانى لیست و هاوپەیمانێتییەکان و چۆنییەتى بەشداریی کەرکوکییەکان لەو پرۆسەیە دروست کردووە.

ـ حیزبى دەعوە سەرەنجام ساغ بوویەوە کە دوو لیستى جیاوازى هەبێت بۆ هەڵبژاردن (مالیکى و عەبادى)، ئەم هەنگاوەش چاودێرانى دابەشکردووە لەمەڕ ئەوەى ئاخۆ ئەم هەنگاوە دەبێتە هۆى ئەوەى حیزبى فرمانڕەوا ئینشیقاق بکات لەداهاتوودا، یان لەهەر لیستێکیان بارانى دەنگ ببارێت بارانەوەکەى دەڕژێتە کێڵگەى ئەمەوە.

ـ مالیکى فیتۆى زۆرى لەسەرەو ناوى هاوتایە لەگەڵ کارەساتەکانى کەوتنى موسڵ و سپایکەر و دەربەدەرکردنى سوننەو تاکڕەوى و کێشە زۆرەکانى لەگەڵ کورد، بەڵام هێشتا لەگۆڕەپانى کێبەرکێدا بەهێز دەردەکەوێت و لیستە چاوەڕوانکراوەکەى عەبادیش نادیارەو بڕوا وایە لاواز بێت بەپێچەوانەى ئەو پاڵپشتییە نێودەوڵەتییەى هەیەتى.

ـ سەرکردەکانى حەشد چەندین دەرچەیان دۆزیوەتەوە بۆ خۆ دزینەوە لەیاساى حیزبەکان و بەشداریی خۆیان بۆ هەڵبژاردن مسۆگەر کردووە. بڕواش وایە حەشد لیستێکى هاوبەشیان هەبێت بەسەرۆکایەتى هادى ئەلعامری کە بەپێى ئاماژەکان یەکێک دەبێت لە رکابەرەکانى پۆستى سەرۆک وەزیران.

ـ دەرکەوتنى پالێوراوێکى بەهێزى حەشد بۆ سەرۆکایەتى وەزیران هەموو ڕیسەکەى ئەمەریکاو ئەوروپاو عەبادى دەکاتەوە بەخورى و لەبەر رۆشنایی ئەزمونى یەمەن و سوریاو لوبنان و بێسەرو بەرەیی هەنگاوەکانى ئیدارەى ترەمپ ئەم ئەگەرەش شتێکى مەحاڵ نییە.

ـ هەر لەئێستاوە هەڵمەتێکى راگەیاندنى ئێسک شکێن لەنێوان ڕکابەرە چاوەڕوانکراوەکانى عێراق لەفەیسبوک و لێدوانەکان و سوکایەتى و یەکتر شکاندن دەستى پێ کردووەو چاوەڕوان دەکرێت هەڵمەتى راستەقینە لەشێوەى قەسابخانەدا بێت بەتایبەت لەنێوان سەدرو مالیکى و عەبادى و مالیکى. ئەم حاڵەتەش بۆ کوردستان تاڕادەیەک هاوشێوە دەبێت.

ـ بەشداریی کورد لەهەڵبژاردنى عێراق روون نییە کە بەیەک لیست دەبێت یان بایکۆت دەبێت یان هەرکەس بۆ خۆى، هاوکات لەگەڵ ئەمەش ئەگەر هەیە نوێنەرایەتى کورد لەداهاتوو لەبەغدا ببێتە شتێکى هاوشێوەى تەنسیقى هەولێرو بەغدا و وەک ئێستا سەرۆکایەتى کۆمار و وەزارەتى گرنگ بەدەست نەهێنێتەوە.

ـ رێککەوتنى بەغداو هەرێم چەندین بەربەستى لەپێشە لەوانەش بێ متمانەیی دواى ریفراندۆم، سوتانى کارتەکانى کورد، تەفسیرى تاکلایەنەى دەقە دەستورییەکان، کێشەى قەرزو قۆڵە، تاى هەڵبژاردن و بەکارهێنانى وەک کارت، هاوسەنگى ئێرانى و ئەمەریکى، گرێى کەرکوک و ناوچە کێشە لەسەرەکان و دەروازە سنورییەکان.


له‌ ئه‌كاونتی تایبه‌تی نوسه‌ر له‌ فه‌یسبوك وه‌رگیراوه‌

خوێندراوەتەوە1508