كاردۆ محه‌مه‌د

گۆڕان لە ئێستادا‌


بزووتنەوەی گۆڕان، بنەماو ڕێبازی کارکردنی سیاسی خۆی بەڕوونی لە دەستوورەکەیدا دیاریی کردووە و لە کرداریشدا له‌پرۆسه‌ی جیبه‌جی کردن دایه‌. جیاوازی لەگەڵ لایەنە نەریتخوازەکان پاراستووە، ستراتیژی ڕۆشنی سەبارەت بە چەمکە بنەڕەتییەکانی وەک (نیشتمان، هاوڵاتی، شێوازی کار، دیموکراتی، دەمەزراوەیی، سەربەخۆیی، سەروەری یاسا) و کۆمەڵێک پرسی تر ساغکردووەتەوە.

گۆڕان سەر مەشقی ڕاگەیاندنی بزوتنەوەیەکی جەماوەریی و مەدەنیه‌ لە هەرێمی کوردستان و ناوچەکەدا. هەر لەسەرەتاوە پرۆسەی سیاسی کارکردنی گۆران بە مۆدێلێکی هاوچەرخ و نوێخواز هاتە ئاراوە. هەر بۆیە دەبێت لەکاتی قەیران و کێشەکانیشدا داکۆکیکاری سەرڕاستی بنەما و ڕایەڵە ستراتیژییەکانی خۆی بێت.لەم هەلومەرجەدا که‌ دونیا و ناوچەکەمانی پێدا تێدەپەرێت و ڕۆژهەڵاتی ناوەڕاست لەبەردەم داڕشتنەوەی نەخشەیەکی نوێی ناوچەکەدایە و کوردستانیش لەم نەخشەیەدا ئەگەر لەئاست ڕووداوەکاندا بێت، بە دڵنییاییەوە پیگەی خۆی دەبێت، گۆران له‌ پرسی نیشتیمانی دا ستراتیژه‌که‌ی روونه‌ و ده‌ستی لیبه‌رنادات و بۆ ئه‌وپرسه‌ش ده‌ستی هه‌موو لایه‌ک ده‌گری که‌ده‌یانه‌وی پرۆژه‌یه‌کی ستراتیژی نه‌ته‌وه‌ی ئه‌منی هه‌بیت و له‌ ئاست بارودۆخه‌که‌ دابیت .

گۆڕان و نیشتمان.(1)
کوردستانیبوون، مانشێتی سەرەکی کارکردنی بزووتنەوەی گۆڕانە و هەر لەسەرەتاوە لەسەر بنەمای پابەندبوونی بە نیشتمانەوە دامەزراوەو پارێزەری خاک و هاوڵاتیان بنەمای سەرەکی کارکردن و دامەزراندنی بووە. گۆڕان لە پەیڕەوی ناوخۆو کارکردنی زەمینی واقیعیدا جەخت لەسەر هەرێمێکی بەهێز دەکاتەوە کە بەرگەی هەڕەشەکانی دەرەوەی خۆی بگرێت. هاوشانی هێزی پێشمەرگە لە سەنگەری نەبەردی و بەرگری لە خاکی نیشتمانەکەیدایە،  لەم ڕەوشەی ئێستای کوردستاندا کە کێشەکان رۆژ بەڕۆژ ئاڵۆزتر دەبن و ئاسۆی چارەسەریان بە ڕوونی نابینرێت. هاوڵاتیان بە جیاوازی بیرکردنەوەیانەوە، داوای یەک گوتاریی نیشتمانی دەکەن. ڕێگای ڕاستیش بۆ ئەم بارودۆخە ڕێکخستنەوەی لێکترازانی ناوماڵی خۆیەتی. سەرەتاش بە ئاسایکردنەوەی دۆخی هەرێم و کارکردن لەسەر هاوبەشی لەبڕیار و پرۆسەی سیاسی هەرێمی کوردستاندا ئەم بارودۆخە تێدەپەڕێت و ئاسۆی جارەسەر دەردەکەوێت، بە مەرجی دوور لە پاوانکاریی هیچ لایەنێک. پێویستە لەم بارودۆخەشدا هەمو لایەنەکان خۆیان بەخاوەنی نیشتمان بزانن و کۆتایی بە قۆناغی ئاسایشی حیزبی بێنن و ئاسایشی نیشتمانی درووست بکەن.

بزوتنەوەی گۆڕان ستراتیژی باڵای کارکردنی بۆ سەربەخۆیی کوردستانە، هەنگاوی یەکەمیش جیاکردنەوەی گوتاری حیزبی  و دیدی کەسی لەگەڵ گوتاری فەرمیدا، چونکە دۆخەکە هەستیارە و پێویستی بە هەنگاوی ژیرانە هەیە. هەمو ئەمانەش بێ ئاسایکردنەوەی بارودۆخی هەرێمی کوردستان شتێکی مەحاڵە. ئێستا لەهەمو کات زیاتر پێویستمان بە درووستکردنی گوتارێکی فەرمی دەوڵەتی هەیە لەسەر ئاستی ناوخۆ و لەسەر ئاستی دەرەوەدا، ئەمەش پێویستی بە ئیرادە و ویستێکی ئازایانە هەیە کە بەرژەوەندی نیشتمانی و هاوڵاتیانی لەسەروویی هەمو بەرژەوەندییەکانی ترەوە دابنێت. ئەمەش بە درووشم و هاشوهوشی ڕاگەیاندن ناکرێت، بەڵکو کردار دەوێت. چونکە دروستکردنی دەوڵەت  پێویستی بە کردار و بڕیاری نیشتمانییە. ئەم هەنگاوانەش پابەندبوونی هەمو لایەنەکانی دەوێت کە کۆی لایەنە سیاسییەکان و نوێنەری گەل لەسەری ڕێکبکەون و لەئاستی کێشە چارەنووسازەکانی نەتەوەکەماندا بێت، هەمو ئەمانەش لە پێناوی لەدەستنەدانی ئەم هەلە مێژووییەی هاتووەتە بەردەم گەلەکەمان، گیانی بەرپرسیارێتی گەورە دەکەوێتە ئەستۆی هەمو لایەنە سیاسییەکان، لەم ساتەدا هەر لایەک بۆ ئەم ستراتیژە نیشتمانییە دەستپیشخەربێت و کار بۆ بکات. مێژوو و میلله‌ت له‌ کاتی بریاری یه‌ک لاکه‌ره‌وه‌ی خۆیدا خەمخۆری و دڵسۆزی هیچ کەس و لایەنێک لەیاد ناکات  .!

دریژه‌ی هه‌یه‌


*سه‌رۆکی فراکسیۆنی گۆران له‌ خولی سییه‌می په‌رله‌مان

خوێندراوەتەوە1549